Villasimius 26-11-2011 (seconda versada)

poetas/poeti:
Raffaele Portas
Mario Loi
Giovanni Loi
Augusto Casula
Ignazio Melis

ghitarra/chitarra:
Efisio Frau

1 - Raffaele Portas

Po sa saludi non nci est prus fidùcia
candu su pòberu malàdiu e calvu
Tengu su fosili càrrigu a salvu
ma chi nci est perìgulu càmbiu cartùcia

2 - Mario Loi

Sa risposta mia ti improru
ca arrispundendi ti nci gosu
A s'arrispetai assumancu a nosu
asinuncas ti naraus ca ses chentz''e coru

3 - Giovanni Loi

Cumentzendi un'altru poeta
un'argumentu iat initziau
Ita cantus bortas t'at a essi negau
ghetendi is curpas a sa scupeta

4 - Augusto Casula

E e chi notesta fais abusu
deu ti perdu totu sa fidùcia
Giai tenis axiu cambiendi cartùcia
tanti su bersàlliu no ddu pigas prus

5 - Ignazio Melis

Mancu oi mi ndi andu ofèndiu
e mancu càrrigu de feli
Custu amaletzu de Arrafieli
fatzu contu ca no dd' apu intèndiu
 

6 - Raffaele Portas

Su messàju  si depit cunvinci
ca non si bivit prus de sa terra
Po istintu de natura òdiu sa guerra
ma candu mi pongu ddu fatzu po binci

7 - Mario Loi

Finas a s' ùltimu respiru
o menti mia  ti sbellis
Biu a Portas ogus a Melis
spereus chi no ddi fuat su tiru

8 - Giovanni Loi

S'ierru  est un' arrori
tocat a ponni capotus
A bortas sa cassa fait furriotus
mandat saludus a su cassadori

9 - Augusto Casula

A Portas deu dd-agatu prontu
ma deu puru ddi fatzu su duru
Mancai issu non ndi fatzat contu
deu dd-apu biu isconfitu puru

10 - Ignazio Melis

Mancu a sa presentza insoru
pensu chi ddi essit a Carroi
No isparis acanta de Màriu Loi
la' ca cussu sunfrit a su coru

11 - Raffaele Portas

Àlteru guvernu a preparai
Màrio Monti infilau s' est
A a chini at giogau su marranu a mei
tzèrriat agitòriu prima 'e ddu sparai

12 - Mario Loi

Narat ca est sempri prontu
de Cuartu Antoni Pani
Su prus chi timu est su mùssiu de su cani
ma po su tzàchidu non ndi fatzu contu

13 - Giovanni Loi

No  potzu andai a  piscai
ca sa pisca dd-ant serrada
Deu sa scupeta dda tengu apicada
ma unu latzu no mi mancat mai

14 - Augusto Casula

In custu cantu deu nci resistu
e mi praxit a mantenni su stili
Inveci de pigai in manus su fusili
ti biu prus beni imprassendi su santu Cristu

15 - Ignazio Melis

Loi non ti pongas ananti
de is  collegas in su tratenni
Deu a Portas ddu conòsciu beni
e si consillu a no fidai tanti

16 - Raffaele Portas

Augustu scurta su interrogu
po non ti perdi notesta
A certus ddus spantu a guetu de festa
e  poi ddus cassu a latzu e a logu

17 - Mario Loi

E ancora nci cantais
nci depu rispundi fissu
Deu mi fidu de tui e de issu
tanti a longu meda no arribais

18 - Giovanni Loi

Cussu latzu chi at amascau
o collega torra-ddu a  parai
Prima de sparai a unu disarmau
ddi ghetu sa manu e dd-agiudu a satai

19 - Augusto Casula

Est tanti annus chi apu cantau
cun cuddu Serra meda geniali
A Portas is contus ddi bandant mali
andat a cassai e aturat cassau

20 - Ignazio Melis

Portas est postu a su spìgulu
e fait puru versus perfetus
Màriu est avesu a isparai guetus
e no connoscit mancu su perìgulu

21 - Raffaele Portas

Candu seu deu in primu lìnnia
Augustu centrat is paragonis
Casula est bandau a cassa de leonis
e dd-ant impostau in campusantu  'e Sìnnia

22 - Mario Loi

In sa Lìbia sa guerra
e su pùbricu s'est dèpiu esprimi
Ma cun bosatrus ita depu timi
candu no fereis manc'a terra

23 - Giovanni Loi

Un'amigu caru de siguru
ddu tengu in sa  bidd''e Arixi
Cand' ollu arriri mi bistu a pedrixi
e pigu in giru cassadori puru

24 - Augusto Casula

Chini in su cantu ndi tenni de arti
cun is rimas no bolit agiudu
Abarrat in bidda e ponit su scudu
ca innoi nci est corpus de dònnia parti

25 - Ignazio Melis

O Màriu teni-mì fidùcia
e circa sèriu de conclui
Po unu esemplari comenti a tui
no sprecu mancu una cartùcia

 
26 - Raffaele Portas

Aversàrius scint ca ndi tengu
in logu miu e in logus lontanus
A chini avanzat atziendi is manus
mancu coràgiu 'e ddu cuntai tengu

27 - Mario Loi

Niàtziu Melis ses pagu duru
e chi apis sballiau ti dd-acusu
Chi cras ti nant no isparis prus
sprecas cartùcias e altras cosas puru

28 - Giovanni Loi

Fidai deu no mi fidu
mancu chi naras no colliunu
Sa cassa puru est una fortuna
a bortas si fùrriat sacu sbuidu

29 - Augusto Casula

Est necessàriu a onorai
a chini est  bonu cristianu
Imoi o Portas poni-tì segrestanu
ca est s’ùnica cosa chi podis fai

30 - Ignazio Melis

Pastori tremendi che una canna
bistiu de stivalis e istabeddi
Chi Màriu notesta ti salvat sa peddi
po tui est una fortuna manna

31 - Raffaele Portas

Giudasa fut istau testimòngiu
po ponni in cruxi a Cristu est de crei
A chini est armau comenti a mei
No sparis mai chi no nci est bisòngiu

32 - Mario Loi

Finiu est s' argumentu
e ecu is saludus mius perfetus
Nci eus fatu ancora una pariga 'e mutetus
po fai oràriu po su nostu rientru

33 - Giovanni Loi

Non ndi fatzu  de prus rispostas
e Giuanni prus no afannas
Imoi o amigu stuaus is armas
[…] presentza in famìllia nosta

34 - Augusto Casula

Imoi est finiu su giogu
e deu saludu a manca e a sa dereta
Sa poesia est comenti 'e una scupeta
a chini dda puntat ndi podit tirai s'arrogu

35 - Ignazio Melis

Prus no mi potzu esprimi
saludu a dònnia amigu diletu
Deu po armas  usu su rispetu
ma narai a chini emu a depi timi

36 - Raffaele Portas

Ant a scusai is frasis mias
chi apu sballiau s'interrogu
Cun armas fintas guerra de giogu
eus sparau bellas poesias