Villasimius 26-11-2011 (prima versada)

poetas/poeti:
Augusto Casula
Giovanni Loi
Raffaele Portas
Ignazio Melis
Mario Loi

ghitarra/chitarra:
Efisio Frau


1 - Augusto Casula

E di Omeru su bellu poema
est istau iscritu cun arti
De unu pagu de tempus a custa parti
m' agatu de fronti a unu dilema

2 - Giovanni Loi

Si saludu chentza  de capeddu
ma sa boxi est sa prus indicada
Deu pensau ca fut acabada
ita ses torrendi a bogai pitzeddu

3 - Raffaele Portas

A saludai a totus mi spici
augurendi tanti benis
E tui nara ita sperantza tenis
de ddu risolvi o lassai aici

4 - Ignazio Melis

De candu seu in pensioni
riposu de lunis a martis
Fais de totu po chi cras agatis
una giusta solutzioni

5 - Mario Loi

Sa risposta de mei arrici
e sentza chi nci fatza pausa
E m’iat a praxi a sciri sa causa
poita oi t'agatas aici

6 - Augusto Casula

Ma cun is rimas chi deu procuru
s'argumentu speru chi colorit
Sa sperantza mia est chi no pegiorit
ca podit sucedi finas cussu puru

7 - Giovanni Loi

At a bessiri  puru esata
ma preferia  tirai diletus
Pareus gioghendi a fai dispetus
ndi sanat s'una e ndi bessit un'altra

8 - Raffaele Portas

E fuiu m'est unu conillu
e in sa tana intrau nci est
Chi tui afidas sa causa a mei
giai ndi ddus bogu is topis a pillu

9 - Ignazio Melis

E cuntenta totu […]
e ancora est sighendi a proi
Ita at cambiau de ariseru a oi
emu a bolli sciri de Casula

10 - Mario Loi

Non nci ollu fai s' incredibili
ma nemancu s' eroi
S'impènniu miu no mancat mancu oi
ma salvai totu no at a essi possìbili

11 - Augusto Casula

E oi puru in custu divagu
su divertimentu ddis assiguru
Po Portas su dilema est prus maturu
a mei s' est presentendi de pagu

12 - Giovanni Loi

Di amori cantendi sa sposa
tanti fuat una veramenti
Scomitu ca oi totus innocentis
ma cras intendeus calencuna cosa

13 - Raffaele Portas

E in d-una gruta de Bellei
unu Cristu fiat partoriu
Chi su dilema est còmpitu miu
Lassa-ddu tui arrisolvi a mei

14 - Ignazio Melis

Oi cun su nostru sistema
De cantai sei avetzu
Si tui ti spantas po un'amaletzu
ti podit agravai su dilema     

15 - Mario Loi

Si nci fatzu erroris mi scusu
mancai siat de bona vertudi
Tenemu sperantza cun sa gioventudi
ma funt lassendi-mì delusu

16 - Augusto Casula

E in sa Sicìlia e in su continenti
parit chi est finia sa calamidadi
Candu s' arribat a una certa edadi
poita negai ca issu est presenti

17 - Giovanni Loi

Boxi mia prus no isciallas
chi atra borta m' iant connotu
Candu si tratat de arrangiai totu
totus is problemas ghetai-ddus apalas

18 - Raffaele Portas

Cun s'èuru non si podit campai
totu in favori de su cumèrciu
S'òmini est che cardaxu bèciu
o bùngiu o istampu no ddi mancat mai

19 - Ignazio Melis

Cun Antonellu Orrù e cun Defensu
mi seu agatau e m'agatu
Custu nemigu est sempri in aguatu
ma in beridadi nemancu ddu pensu

20 - Mario Loi

In custu argumentu de sostantza
non nci emu a bolli cumiti dannus
Tengu setantacuatru annus
e no ddi perdu ancora sa sperantza

21 - Augusto Casula

A mei mi donat forti consolu
candu lìgiu bellas rigas
Poita o Nàssiu naras ca ti ndi frigas
castia-tì in su sprigu  ca si esprimit solu solu

22 - Giovanni Loi

Amigus  si  bolia nai
ca faulas intendendi seu
Su vìtziu de nai dda cumandu deu
est prus giustu meda a dda cuntratai

23 - Raffaele Portas

Po benèssiri de is cristianus
nasciat de Giusepi su fillu
Mi iat mussiau unu cocodrillu
e ddu lotu ancora spada in is manus

24 - Ignazio Melis

Is antigus Loni e Loddi
fiant àbilis in is esemplaris
Notesta puru Casula mi paris
che Màriu est totu tropu coru moddi

25 - Mario Loi

Ti nci depu rispundi siguru
cun sa frasi prus sincera
Ndi apu afrontau a dònnia manera
ma seu cuntentu diaici puru

26 - Augusto Casula

E oi puru Nàssiu ti imbellis
ma no presentis altru problema
Castiai-ddu beni ca in custu dilema
Loi est fendi comenti a Melis

27 - Giovanni Loi

Cun sa chitarra  e su contra e bo
mi praxiat  a mi spassiai
Tui o Màriu  prova a cunfessai
tui tenis tzampillu nou

28 - Raffaele Portas

Chi su dilema non benit risoltu
nci apu a perdi corteddu e pani
Nci est chini est fendi is trassas che mergiani
a pei in su latzu si ghetat a mortu

29 - Ignazio Melis

Susteni o Casula susteni
puru chi tengas una certa edadi
Candu m' agatu in dificoltadi
m' impènniu a fundu po stai prus beni

30 - Mario Loi

Cuasi in dònnia dimora
dd'onoru cust'argumentu
Fradili miu stai prus atentu
asinuncas ti imbècias prima de s' ora

31 - Augusto Casula

E mi bollu esprimi cun fueddus comunus
oi puru de bravu cantanti
Si custu dilema ddu portaus ananti
mirai ca no est curpa de nisciunus

32 - Giovanni Loi

No tengu  nisciuna pretesa
candu bessu in giru po aflui
Funt ghetendi is curpas a tui
e no ti biu un'arma de difesa

33 - Raffaele Portas

Su chi cantat  e no est confusu
portat a termini totus is finis
Casula est armau che is tostoinis
mancu is pistillonis ddu mudrint prus

34 - Ignazio Melis

Augustu fait de guida
poita concèdiu si dd'ant
Iat a essi bellu a percurri sa vida
sentza de agatai un'ostàculu innantis

35 - Mario Loi

Necessàriu est chi nci canti
e cun issus ancora  mi stentu
Po finas a oi mancu mi lamentu
su chi mi secat est de imoi innantis

36 - Augusto Casula

No nci bollu fai nisciuna sententza
ca donniunu est sogetu a sa sua sorti
Portas m' at nau ca mi intendu forti
e donniunu fait cunforma a s'assentza

37 - Giovanni Loi

Pagus bortas est chi m' inchietu
ma no bandu mancu atumba atumba
Imoi ca seus in s'ora de sa tumba
poita no andaus totus a bratzetu

38 - Raffaele Portas

Is ascurtantis su versu […]
fintzas de su chi no est meravìllia
Chi podeus nai su mali de famìllia
s' arràngiant puru ma no ddu debellant

39 - Ignazio Melis

Po no benni a  fini interròmpiu
o Casula ti ndi consolis
Chi  no as otentu totu su chi bolis
cuntenta-ti-ndi de aundi ses lòmpiu

40 - Mario Loi

Cun Casula fendi de guida
Giuanneddu no si scit esprimi
Deu seu giai cumentzendi a timi
po su brutu rigalu chi apu a tenni in vida

41 - Augusto Casula

O Nassieddu comenti ti esprimis
ti ias a bolli giai in prima scheda
Vantas de essi coragiosu meda
ma in sei in sei aìntrusu giai timis

42 - Giovanni Loi

Atentu  caru Marieddu
la' ca deu no seu assenti
Tui mi naras ca ses innocenti
ma in su coru miu giai nci est dubieddu

43 - Raffaele Portas

No mi intendu  versadori scaltru
mancu a sa artesa de Augustu
Casula aturat su didu a su giustu
si no problemas ndi essit un' altru

44 - Ignazio Melis

Augustu circa de ti uniri
ca est in su nostu cantai de sei
Mancu cun cussus prus ricus de mei
no apu tìmiu mai a bessiri

45 - Mario Loi

O pùbricu mi depat crei
ca portu giai is sensus stancus
Fradili miu ses a pillus biancus
e tui dda buscas comenti a mei

46 - Augusto Casula

Nosu dd'’oleus  pigai po giogu
custu sistema de improvisai de sei
Cussu chi si creit mannu a sei
candu nci arruit si tremit su logu

47 - Giovanni Loi

Candu  deu  dongu unu fueddu
de mei non ti podis fui
Candu no lassant cumandai a tui
fais cuaddus e bogas pitzeddu

48 - Raffaele Portas

Sentza de portai pillu Sansoni
mancu de is fortzas fait usu
Segundu Casula no imbèciat prus
a setanta annus cantendi a caboni

49 - Ignazio Melis

De rispundi no ti proibu
ma rispeta règola e leis
No apu mai artziau is peis
po tocai cosas chi no ddu arribu

50 - Mario Loi

Fradili miu ancora nci propagas
e a ti ddu spiegai mi otempri
Is chi apu fatu ddus apu sistemau sempri
e su chi ses fendi oi candu est chi ddu pagas

51 - Augusto Casula

E in Cuartu e in su Campidanu
su cantai est ancora unu bellu sistema
Seis totus aintru de custu dilema
no ddu oleis amiti e mi parit stranu

52 - Giovanni Loi

Medas bortas m'agatu confusu
ca mi mancat totu su comenti
Ponei sa firma ananti de sa genti
comenti dispetus non ndi feis  prus

53 - Raffaele Portas

Est inùtili a essi tentu a cua
is mancantzas chi portas cuadas
Unu dilema portat centu stradas
e tui no cunfirmas cali fut sa tua

54 - Ignazio Melis

Ca s'àteru giru ti citis
e de custu teni-ndi incuru
Seus in mesu ma cun tui puru
e bollu biri custa dda amitis

55 – Mario Loi

Custu guvernu pagu perfetu
no ddi potzu nai ca est galanti
De custus cincu seu su cumandanti
e si impongu a mi tenni fintsas de rispetu

56 - Augusto Casula

De Arborea Eleonora
est istada òspiti  de Villasanta
Deu […] di acanta acanta
ma ‘osatrus seis aintru diora

57 - Giovanni Loi

Custa genti  chi s' at ascurtau
prexeri ca ddus portu acanta
Poita no andaus cun sa paxi santa
aici no feus perunu pecau

58 - Raffaele Portas

A is de bidda e a is istràngius
unu saludu emu a bolli acudi
Unu problema mannu miu est sa saludi
andendi ainnantis a fortza de arràngius

59 - Ignazio Melis

Si saludu ca s' ora est tarda
comenti teneus s' usantza
Guai de chini perdit sa sperantza
de sighiri custa poesia sarda

60 - Mario Loi

Efìsiu Frau ancora sonat
ca ormai eus finiu custu aflui
O tempus bonu agiuda-mì tui
de podi fai una becesa bona

61 - Augusto Casula

E imoi nisciunus m'interrompit
e mancu de selliai no mi proibat
Su dilema est sa becesa chi arribat
e donniunu dda arriciat comenti ddi lompit