Villasimius 26-11-2001

poetas/poeti:
Antonio Crisioni
Benvenuto Demontis
Marco Melis
Antonello Orrù

1 - Antonio Crisioni

Cun sa màssima educatzioni
s'aspetadori chi innoi cumparit
emu a bolli ringratziai
po s'arricia ospitalidadi
rispetosamenti mi-ndi pesi
ca su prestìgiu altu mi mantenit
cun is mius collegas atesti
emu a bolli onorai in fini
s'organizau festinu augustu

A chini tenit volontadi arit
custu est su mesi de fai sa racioni

2 - Benvenuto Demontis

Cun Tziu Licu, Serra e Crisioni
impari eus viagiau
custu logu sentza de menzònnia
dònnia caru amigu atendiat
ca unu bonu pràngiu si preparat
ca funt amigus chi donant esemprus
e si torraus ancora innoi
speru ancora chi ndi preparit

Parit chi oi su tempus siat cambiau
oi si arat in dònnia stagioni

3 - Marco Melis

De Crabonaxa in sa bella zona
ecu torra chi mi nant avanti
e cun d-unu fillu de Serra
impari eus fatu sa strada
imoi mostraus modestus esèmpius
in custu festinu giojosu
e donniunu is ainas imperat
de su cantu sentza de superònnia

Dònnia operosu de s'annada amanti
sperat in su tempus e in sa terra bona

4 - Antonello Orrù

Po onorai s'insoru divagu
de Sìnnia bènniu seu siguru
si sa passioni ancora fiorit
circu innoi de mi fai agradessi
e de Crisioni is esemprus
ddus sigheus cun seriedadi
ma initziendi bollu ringratziai
a chini m'at bòfiu in custa zona

Sa bona volontadi nci at a essi puru
mancai su tempus favorit pagu

5 - Antonio Crisioni

Cun sa màssima riconoscentza
in dònnia sulcitana gara
chi issu sighit unu giustu scopu
e su prestìgiu altu po ndi tenni
sa mascota po dònnia cantanti
po is maurreddus est Allicu Serra
su chi podit onorai atesti
su mutetu sardu postu in usu

In prus de sa terra beni manixada
est importanti tropu sa sementza

6 - Benvenuto Demontis

O mulleri mia Annarosa
coranta annus seus sposaus
ma no fiat tropu su divau
po sa tropu misèria agiunti
issa no fut bianca vesti
ma nosu seus sèmpiri duus amoris
chi resistint in paxi e in guerra
e deu ddus festègiu innoi

oi is agricoltoris sunt aumentaus
ca sa terra est pagu traballosa

7 - Marco Melis

Serbit a tenni una menti sana
de elògiu po tenni auspìciu
po figurai cun chini s'ascurtat
bolit scìpia bussai sa carta
ma de su gèniu vàrias scortas
no sèmpiri assistint in cantada
cuindi nendi grandesa garantu
emu a nai una superpònnia

Dònnia giorronnada fata in sacrifìciu
e cantu bortas arresurtat vana

8 - Antonello Orrù

Tranncuillu Crisioni procedas
cun su sòlitu costumu cantis
ca de annus ses faendi prodìgius
cun sa sterrina tua e sa rima
girendi de comunu in comunu
cun antzianus e giòvunus gherras
indossas una onorada vesti
in is piatzas ti fais aplaudiri

A biri is terras che a prima verdegiantis
est unu disìgiu de medas

9 - Antonio Crisioni

Su caboniscu cun is macarronis
dònnia tanti disigendi bandu
ca est saboriu issus ddu scint
sentza chi àtera petza mi nomenint
de cussas diis prus ndi orbescit
ca su mangimi at fatu sconcuassu
de cuddu bellu sabori antigu
su mercau no ddu biint prenu

In terrenu grassu semenint a brandu
ca su trigu crescit cun binti pillonis

10 - Benvenuto Demontis

No dda murrùngiu sa strada fata
e ne cussa chi at fatu elevai
seu annus andendi e benendi
in custu logu po sa sarda rima
cumentzau emu cun is mannus
e oi cun astutus bagadius
de calencunu chi ndi portu acanta
ma funt giai chi donant esemplus

A tempus miu prima de arai
nci passànt annus boghendi mata

11 - Marco Melis

Su campioni natzionali Tardelli
de su campu no est prus in tronu
ma de sa nosta italiana dimora
calcisticamenti esèmpiu pigu
ma in onori de sa sua vesti
oi tifosu ancora ddu abratzas
e nemus ddu puntat su didu
e pagus funt is personas contràrias

Tra is vàrias ratzas de trigu bonu
sorridu ca nci est ancora su Cappelli

12 - Antonello Orrù

A sa paxi est ponendi màcua
s'atuali gherra disastrosa
ca po curpa de sa vili arrogantza
insanguinendi funt su terresti
su mundu s'est bistendi a dolu
ma in dii de oi est cosa ridìcola
su terrorista no firmant in pressi
eus a bivi dolorosas diis
e po s'innocenti est pagu pro'

Sa crisi agrìcola est spaventosa
ma no at a essi solu po mancantza de àcua

13 - Antonio Crisioni

Benedetu s'animali de mou
no ddi donis palla asserru-asserru
si ddus tenis imbudus duus e tres
dona-si-ddus de lori baratu
su bixinau interu t'est connotu
ca mollis sèmpiri sentza de andai in fallus
e sa bastanti genti si-ndi òviat
ca no tenis is mezus espertus

De certus traballus fatus in s'ierru
scòviat totu su mesi de argiou

14 - Benvenuto Demontis

Chi mali funtzionant is frenus
gei tenit tempus de frenai
e si in màchina nci sunt operajus
prus dannosus bessint is intrècius
[...] manutentzionis si trascurant
atentzioni a su volanti

Finas chi aturant is bècius traballendi
is granajus ant a aturai prenus

15 - Marco Melis

Su cantai no est totu afetu
ma nci bolit puru sa malìtzia
in palcu apu finas sunfriu
de fronti a una contrària parti
ca si scit ca in is cantadas
mancai si tengat su coru obertu
ddu imponint is sardas schedas
in palcu a fai su volponi

Crisioni espertu in s'arti messarìtzia
in medas annadas ddu apu biu inchietu

16 - Antonello Orrù

Giotu artista de pesu
cun is pinzellus depias preni
telas chi as donau in consìnia
apoi is coloris depiat sciolli
e in Milanu eus connotu
su palatzu de is viscontis
e si bolit genti domandandi
totu is òperas chi depiat costrui

E tui Demontis po arregolli beni
boga-ndi totu sa gramìnia de mesu

17 - Antonio Crisioni

Su cantadori chi in palcu si vantat
a s'ascurtanti mancu ddu interessat
su veru espertu de su contra e bo'
dònnia concetu ascurtau imparat
deu a sa modèstia manifesti
àtera presuntzioni no agiunta
ca mi parit giustu a rinverdi
su bellu cantu onorau infini

Chini semenat, arat e messat
a nci perdi totu su coru no cantat

18 - Benvenuto Demontis

Si in Crabonaxa mi orbescit
prus de una borta gei m'est capitau
ma mai nci est stètiu impero'
candu bengu a mi trateni
ca nci tengu prena sa bisàcia
e aundi andai gei ddu sciu
is amigus mi faint oferta
po mi ponni in calencunu stampu

In su campu miu beni traballau
de certa erbàcia no ndi crescit

19 - Marco Melis

Su muradori de esperientza
sa lentza narat beni acumpangi
e su progetu chi beni at traciau
no ddu pensat tropu impressiu
poi de matonis in cantidadi
nci-ddus ghetat cun arti che capu
ma a is bortas narat no mi consoli
candu no est a gèniu suu
su traballu sentza de decoru

Su coru tuu du apu biu prangi
ca su soli t'at abruxau sa sementza

20 - Antonello Orrù

Annus fait una picioca distinta
mi giogàt unu schertzu brutu
e pariat de is fèminas delicadas
cun d-unu sorrisu chi luxiat che faru
ma is risorsas ddas iat giai bèndias
s'amori facilmenti ddu alluas
cuindi est mellus a si castiai
candu unu si circat fèminas

Is sèminas tuas caru Benvenutu
mai intèndias andadas a trinta

21 - Antonio Crisioni

Candu Cicita sa cassola cois
agiungi-si-ddas duas o tres piarras
ca is maurreddus ddu tenint a usu
specialmenti is de gustus maturus
deu no ndi fatzu nisciunu distacu
candu in su pratu is frochitas s'intrèciant
su gustu issus mi-ddu nomenint
po ndi podi onorai atesti
su prelibau pratu sentza de fallus

Nci-ndi est chi pigant imbudu po cuarra
e a traballu prenint su sacu de duus mois

22 - Benvenuto Demontis

Antonellu no ti dongu nexi
si ascurtas totu su chi nant
ma de mei postu a su fiancu
atentu stiat a sa pinta
si-ddu naru comenti a unu fradi
ca si su bonu sensu aguantat
in dònnia logu ddi ant a tenni stima
de sa carriera finas a sa fini

Chini vantat trinta e coranta
de prima scelta mancu dexi

23 - Marco Melis

Po Leonardu cun prus de un'afriscu
dexit una dìnnia lodi mia
ormai famosu in totu is logus
po sa sua artìstica favella
pintendi teniat arti e scola
sa manu sua benidita e santa
de s'Itàlia est su nostu eroi
e su pòpulu ddi tenit stima

Prima traballànt cun bella armonia
imoi in s'argiola ogus in cannescu

24 - Antonello Orrù

[…] ascosta-mì siguru
ca biaxi mannu no ti-ndi atuas
mi ses personi genuina e amiga
e una batuta si fait po brulla
a bortas tocat a si contrastai
ca custu cantu improvisau
no est sèmpiri chi profumat
comenti fiat a is tempus de tziu Nonnoi

Apoi messau in sa stula tua
costumat a digiunai sa fromiga puru

25 - Antonio Crisioni

Benedetu de mengianu arat
cun s'arau de linna in sa tressa
atocu-atocu che bravu massaju
a si purgai su sèmini pensat
cun is fillus totu a is tres
sa racioni tenit manixada
po dda depi de trigu biancu
semenai totu abrandu-abrandu

Candu s'annada comintzat cumbessa
nemancu su mesi de maju dda riparat

26 - Benvenuto Demontis

Antonellu no ti trascuru
ma cun mei siast precisu
ca mi ses unu caru amigu
e sighis a mi rendi consolu
fra nosu no nci-ndi est scrètziu
e speru beni chi si consolint
is mutetus nostus ascurtendi
de is cantantis chi ses in is schedas

Medas arregollint solu fangu isu
e ddu bendint a prètziu de trigu duru

27 - Marco Melis

Eventus tristus su mundu scriit
e ddi tocat chi canti osanna
ca sa guerra peus de is camorras
tenit sèmpiri is interessus suus
a su potenti custu ca cumbenit
e no ndi-ddi parit bregùngia
bastit chi issu si cretat mannu
e is sordaus morint a fitas
dònnia coru sighendi a distrui

Tui chi meritas incùngia prus manna
de s'annu chi benit torras a sorridi

28 - Antonello Orrù

Su pòberu po concuistai su pani
dii e noti narat mi pistu
e s'invocat a s'Onnipotenti
ca de totus issu est su capu
ma cantu ànimas disisperadas
po su continenti pigant sa fua
e a stentu unu pani ddu sperras
disigendi cosa prus bona

Ma in zona tua apu bistu
terras seminadas a denti de cani

29 - Antonio Crisioni

Cara genti ti strìngiu sa manu
mancai no sia cantendi in piatza
cun sa màssima professioni
cun tui Crisioni si ristorit
àteras bortas a benni a nci cenai
mancai fatza sa parti novena
e po sa màssima riconoscentza
fut su fiascu puru de binu fini

A chini semenat milliorit s'arratza
sentza de invidiai su muntoni mannu

30 - Benvenuto Demontis

Est ora chi rientri a bidda
si sa màchina ponit in motu
chi a bortas cumandat issa
e delusu a mei m'at lassau
no ndi seu siguru mai
chi de issa ndi siat su capu
ma speru prus chi no si guastit
po su tempus chi ancora dda oberu

Speru su chi apu semenau e arregortu
bastit po pagai sa lissa e s'anguidda

31 - Marco Melis

[...] e cantu s'ùrtima rima
prima chi nci passit sa sita
a scuriu imoi si parteus
torraus in zona de Pillai e Serra
e a dònnia gentili sinniori
ddu assistat su divinu celesti
e po is mutetus oi decantaus
speru sa cantada siat pràxia

Crabonaxa est terra benedita
seminaus amori, arregolleus stima

32 - Antonello Orrù

Po s'Egitu faiat s'itineràriu
Maria po salvai a Gesus
ca Erodi depiat sciolli
su tradimentu po ddu massacrai
e de su fillu Gesus Giusepi postu a fiancu
su fillu narat mi-ddu difendu
e sa salvesa sua dda consideru
sa fortuna nosta pero'

No prentendu de acucurai su susu
ma speru assumancu de arregolli su necessàriu

33 - Antonio Crisioni

Aturat sèmpiri a sa manu de cou
su giru de sèlliu chi sa genti afannat
deu si-ddu cantu sentza de superònnia
comenti fent in su tempus antigu
e Ferdinandu ormai ddu scint
e custu invitu sovranu e maturu
cras is amigus ndi arrexonint
de custu poèticu giubileu

Deu s'auguru chi su trigu ingranat
e donit su binti in dònnia argiou